Niżżel il-fuljett tal-Kelma tal-Ħajja bil-Malti
“Agħtuhom intom x’jieklu” (Lq 9, 13).
Ninsabu f’post ftit ʹil barra minn Betsajda, fil-Galilija, fejn Ġesù kien qed ikellem lil ġemgħa kbira ta’ nies fuq is-Saltna t’Alla. L-Imgħallem kien mar hemmhekk mal-appostli biex jistrieħu wara l-missjoni twila li kellhom f’dawk l-inħawi, fejn huma ppridkaw il-konverżjoni: “Ħarġu, mela, u bdew iduru l-irħula jxandru l-Bxara t-tajba u jfejqu l-morda kullimkien”1. Għajjenin kif kienu, imma b’qalbhom mimlija, bdew jirrakkontaw l-esperjenza tagħhom.
Meta n-nies saret taf li Ġesù u d-dixxipli kienu qegħdin hemm, bdiet tinġabar madwarhom. Ġesù laqa’ ʹl kulħadd: beda jisma’, jitkellem u jfejjaq. Sadattant il-folla bdiet tiżdied, kien riesaq il-lejl u l-ġuħ beda jagħmel ġmielu. L-appostli bdew jinkwetaw u lill-Imgħallem tawh soluzzjoni li kienet tagħmel sens: “Ibgħathom in-nies, ħa jmorru fl-irħula u fl-irziezet tal-qrib, biex isibu fejn jistrieħu u jieklu xi ħaġa”. Wara kollox, Ġesù kien ġa għamel ħafna… Imma hu weġibhom:
“Agħtuhom intom x’jieklu.”
Baqgħu mistagħġba għax kif setgħu jitimgħu lil dawk l-eluf kollha ta’ nies b’ħames ħobżiet u żewġ ħutiet! Ma kienx possibbli li f’dawk l-inħawi ta’ Betsajda jsibu l-ikel kollu meħtieġ u lanqas kellhom il-flus biex jixtruh.
Ġesù ried jiftħilhom għajnejhom. Lilu kienu jinteressawh il-bżonnijiet u l-problemi tan-nies, u hu kien jara kif jagħmel biex isolvihom. Beda b’dak li kellhom f’idejhom, li kien ftit wisq. Imma ried isejħilhom għal missjoni: li jkunu għodda f’idejn il-ħniena ta’ Alla li jieħu ħsieb uliedu. Il-Missier jagħmel il-parti tiegħu, imma “għandu bżonnhom”.
Il-miraklu “jeħtieġ” li aħna nagħmlu l-parti tagħna u nemmnu, il-bqija jagħmlu hu.
“Agħtuhom intom x’jieklu.”
Għall-oġġezzjoni tal-appostli Ġesù ta l-għajnuna tiegħu, imma talabhom jagħmlu l-parti sħiħa tagħhom, anki jekk din kienet ċkejkna. Ma solviex il-problema minflokhom, iżda l-miraklu seħħ. Talabhom jagħtu s-sehem tagħhom b’mod sħiħ u dak li kien hemm tqassam bejn kulħadd. Dan kien jitlob sagrifiċċju u fiduċja fih.
L-imgħallem jitlaq minn dak li ngħaddu minnu biex jgħallimna nieħdu ħsieb xulxin. Quddiem il-bżonnijiet ta’ ħutna m’għandniex għax inġibu skużi: “din mhix biċċa tagħna”, “jien ma nista’ nagħmel xejn”, “iridu jaraw kif se jsibu soluzzjoni, kif jagħmel kulħadd…”. Fis-soċjetà skont il-ħsieb ta’ Alla, huma mberkin dawk li jitimgħu lil min hu bil-ġuħ, li jlibbsu ʹl-foqra, li jżuru lil min jinsab fil-bżonn.2
“Agħtuhom intom x’jieklu.”
Ir-rakkont ta’ din il-ġrajja jfakkarna fit-tixbiha tal-ikla li jirrakkonta dwarha l-ktieb ta’ Isaija, u li Alla stess joffri lill-ġnus kollha, meta hu “jixxotta… d-dmugħ minn fuq kull wiċċ” 3.Ġesù qalilhom biex joqogħdu bilqiegħda ħamsin ħamsin. Bħala Iben, hu jġib ruħu bħall-Missier, u b’hekk jidher biċ-ċar li hu tassew Alla.
Hu stess tana kollox, sar ikel għalina, fl-Ewkaristija, l-ikla ġdida tal-aħwa.
Meta raw il-ħafna bżonnijiet li kien hemm waqt il-pandemija tal-covid-19, il-komunità tal-Fokolari ta’ Barċellona, waqqfu grupp li fih bdew jgħarrfu lil xulxin bil-bżonnijiet li kellhom permezz tal-mezzi soċjali. Bdew jaqsmu bejniethom minn dak li kellhom. Kienet impressjonanti tara kif bdew jagħtu għamara, ikel, mediċini… “Waħedna ftit nistgħu nagħmlu”, imma “flimkien nistgħu nagħmlu ħafna”. Il-grupp “Fent família” għadu sal-lum jgħin biex iseħħ dak li kien isir fl-ewwel komunitajiet insara, fejn ħadd ma kien jonqsu xejn 4.
Silvano Malini
u l-grupp tal-Kelma tal-Ħajja
1: Lq 9, 6
2: Ara Mt 25, 35-40
3: Is 25, 8
4: Ara At 4, 34